Test pështyme për zbulimin e hershëm të kancerit të stomakut

Çdo vit diagnostikohen mijëra raste të reja dhe shumë pacientë humbin jetën, kryesisht sepse sëmundja zbulohet vonë për shkak të simptomave të paqarta. Studiues nga Kina kanë identifikuar rreth 20 lloje bakteresh që gjenden rregullisht në stomakun e pacientëve me këtë sëmundje. Sipas tyre, këto baktere mund të shkaktojnë rritje të aciditetit në stomak dhe të nxisin ndryshime kancerogjene. Një zbulim kyç është se shumica e këtyre baktereve e kanë origjinën në gojë dhe më pas kalojnë në stomak. Bazuar në këtë, shkencëtarët sugjerojnë se në të ardhmen mund të përdoret një test i thjeshtë i pështymës për të zbuluar praninë e këtyre baktereve në fazat e hershme të sëmundjes, kur trajtimi është më efektiv. Ekspertët vlerësojnë se ky studim forcon idenë se ekziston një lidhje e rëndësishme midis mikrobiomës së gojës dhe asaj të zorrëve në zhvillimin e kancerit të stomakut, dhe se testet jo-invazive si analiza e pështymës ose feçeve mund të bëhen në të ardhmen mjete të rëndësishme diagnostikuese. Aktualisht, kanceri i stomakut diagnostikohet zakonisht përmes endoskopisë, një procedurë ku një kamerë futet në stomak për të parë ndryshimet e dyshimta. Në këtë studim, shkencëtarët analizuan mbi 400 mostra pështyme dhe feçesh nga pacientë me kancer të stomakut dhe identifikuan 23 lloje bakteresh në stomak, nga të cilat 20 u gjetën edhe në gojë. Sipas tyre, infeksioni fillestar me Helicobacter pylori mund të dëmtojë mbrojtjen e stomakut, duke lejuar që baktere të tjera të vendosen dhe të shkaktojnë infeksione të vazhdueshme që me kalimin e kohës çojnë në kancer. Studimi sugjeron se një program i gjerë kontrolli me teste pështyme mund të identifikojë rastet e hershme të kancerit me saktësi të lartë. Megjithatë, ekspertët paralajmërojnë se nevojiten kërkime të mëtejshme përpara se kjo metodë të përdoret gjerësisht në praktikë. Simptomat e kancerit të stomakut përfshijnë humbje oreksi, vështirësi në gëlltitje, tretje të keqe që nuk kalon dhe lodhje të pashpjegueshme. Shpesh këto shenja neglizhohen, duke bërë që diagnoza të vendoset në faza të avancuara. Në fazat e vona, shanset për mbijetesë janë të ulëta, çka e bën edhe më të rëndësishëm zbulimin e hershëm të sëmundjes. /GazetaExpress/ The post Test pështyme për zbulimin e hershëm të kancerit të stomakut appeared first on Gazeta Express.