Studimi për kancerin e zorrës: Asnjë rikthim pas trajtimit të ri

Rezultatet, të arritura nga ekipet e University College London dhe University College London Hospitals, janë cilësuar si “jashtëzakonisht inkurajuese”. Kanceri i zorrës është një nga më të përhapurit, me dhjetëra mijëra raste të reja çdo vit, dhe kohët e fundit është vërejtur rritje edhe tek të rinjtë. Studimi përfshiu 32 pacientë me kancer të zorrës në fazën e dytë dhe të tretë, të cilët kishin një profil specifik gjenetik (MMR-deficient/MSI-high). Këta pacientë u trajtuan me imunoterapi për deri në nëntë javë përpara operacionit, në vend të trajtimit standard që zakonisht përfshin operacionin e ndjekur nga kimioterapia. Rezultatet fillestare treguan se tumoret u zvogëluan ndjeshëm, dhe në 59 të rasteve nuk u gjetën më gjurmë kanceri pas operacionit. Pas një periudhe ndjekjeje prej 33 muajsh, asnjë nga pacientët nuk pati rikthim të sëmundjes — një rezultat shumë i rëndësishëm, duke qenë se zakonisht rreth një e katërta e pacientëve të trajtuar me metodat standarde përjetojnë rikthim brenda tre viteve. Ekspertët besojnë se kjo qasje, me imunoterapi përpara operacionit, mund të jetë një mënyrë efektive për trajtimin e këtij lloji kanceri. Sipas studiuesve, një nga aspektet më premtuese është mundësia për të parashikuar se cilët pacientë do të reagojnë më mirë ndaj trajtimit, përmes analizave të personalizuara të gjakut dhe profilizimit imunitar. Këto metoda mund të ndihmojnë në përshtatjen e trajtimit për çdo pacient, duke shmangur terapi të panevojshme për disa dhe duke identifikuar ata që kanë nevojë për trajtim më intensiv. Një nga pacientët pjesëmarrës në studim, 73-vjeçari Christopher Burston, tregoi se trajtimi ka qenë transformues për jetën e tij. I diagnostikuar në vitin 2023 përmes kontrollit rutinë, ai iu nënshtrua imunoterapisë dhe më pas operacionit, me efekte anësore minimale. Sipas tij, pas ndërhyrjes, mjekët i thanë se tumori ishte zhdukur pothuajse plotësisht. Sot, më shumë se tre vite më vonë, ai është pa kancer dhe është rikthyer në jetën normale. Studiuesit analizuan gjithashtu mostrat e gjakut për të kuptuar pse trajtimi ishte kaq efektiv. Ata zhvilluan teste të personalizuara që mund të tregojnë nëse trajtimi ka funksionuar dhe nëse ka mbetur ndonjë gjurmë kanceri në organizëm. Rezultatet treguan se zhdukja e ADN-së së tumorit nga gjaku lidhej fort me mungesën e kancerit në trup, ndërsa analiza e sistemit imunitar mund të ndihmojë në parashikimin e reagimit ndaj trajtimit. Megjithëse nevojiten studime më të mëdha për të konfirmuar këto gjetje, rezultatet aktuale konsiderohen një hap i rëndësishëm drejt trajtimeve më të personalizuara dhe më efektive për kancerin e zorrës. /GazetaExpress/ The post Studimi për kancerin e zorrës: Asnjë rikthim pas trajtimit të ri appeared first on Gazeta Express.