Probiotikët dhe antibiotikët: A duhen dhe cilët të zgjidhni?

Kjo ndodh sepse antibiotikët janë medikamente me spektër të gjerë – ata nuk shkatërrojnë vetëm bakteret që shkaktojnë infeksionin, por edhe bakteret e dobishme në zorrë. Si pasojë, prishet balanca e mikrobiomës, duke krijuar kushte për shtimin e baktereve të dëmshme dhe duke shkaktuar probleme si dhimbje barku apo çrregullime të tretjes. Tek personat që marrin antibiotikë për periudha të gjata, për shembull për akne apo infeksione të përsëritura urinare, kjo çekuilibër mund të zgjasë me vite. Disa ekspertë paralajmërojnë se kjo mund të lidhet edhe me probleme më serioze, si diabeti i tipit 2 apo sëmundje inflamatore si astma. Për këtë arsye, gjithnjë e më shumë mjekë rekomandojnë përdorimin e probiotikëve gjatë ose pas një kure me antibiotikë, për të rikthyer bakteret “e mira” në zorrë. Megjithatë, studimet nuk janë plotësisht në një mendje. Një analizë e vitit 2021 me 36 studime tregoi se një lloj i zakonshëm probiotiku, Lactobacillus rhamnosus, mund të ulë shfaqjen dhe kohëzgjatjen e diarresë dhe fryrjes së barkut. Nga ana tjetër, një studim i vitit 2018 sugjeroi se përdorimi i probiotikëve pas antibiotikëve mund të vonojë rikthimin e mikrobiomës në gjendjen normale. Në këtë studim, pjesëmarrësve iu deshën deri në gjashtë muaj për t’u rikthyer në balancë, krahasuar me vetëm tre javë tek ata që nuk morën probiotikë. Shpjegimi i mundshëm është se probiotikët mund të shtojnë lloje bakteresh që nuk janë natyrshëm pjesë e mikrobiomës së individit, duke penguar rikthimin e balancës origjinale. Megjithatë, ekspertët theksojnë se ky studim ishte i vogël dhe nuk jep përfundime përfundimtare. Studime të tjera sugjerojnë se disa probiotikë mund të ndihmojnë në rikuperimin më të shpejtë të mikrobiomës. Specialistët bien dakord për një gjë: nëse përdoren, koha është shumë e rëndësishme. Probiotikët nuk duhen marrë njëkohësisht me antibiotikët, pasi këta të fundit mund t’i shkatërrojnë bakteret e dobishme. Rekomandohet që të merren në interval mes dozave të antibiotikut. Jo të gjithë probiotikët janë njësoj. Një nga më të studiuarit është Lactobacillus rhamnosus, i njohur për aftësinë e tij për t’i mbijetuar aciditetit të stomakut dhe për t’u ngjitur në murin e zorrëve, duke ndihmuar në rikuperimin e mikrobiomës dhe forcimin e barrierës së zorrëve. Organizata Botërore e Gastroenterologjisë rekomandon përdorimin e suplementeve që përmbajnë këtë bakter gjatë trajtimit me antibiotikë. Një tjetër përbërës i dobishëm është Saccharomyces boulardii, një probiotik me bazë maja, i cili është treguar se ndihmon në parandalimin e diarresë së lidhur me antibiotikët dhe në rikthimin e shëndetit të zorrëve. Në përfundim, probiotikët mund të jenë të dobishëm gjatë trajtimit me antibiotikë, por zgjedhja e llojit dhe mënyra e përdorimit janë kyçe. Dhe, si shpesh në mjekësi, reagimi mund të ndryshojë nga një person te tjetri. /GazetaExpress/ The post Probiotikët dhe antibiotikët: A duhen dhe cilët të zgjidhni? appeared first on Gazeta Express.