Ylli i Barcelonës po monitorohet si pasardhës i Griezmannit nga Atletico

Më herët gjatë kësaj jave, Antoine Griezmann konfirmoi largimin nga Atletico Madridi, pasi nënshkroi kontratë me Orlando Cityn, ku do të transferohet në fund të sezonit europian. 35-vjeçari do t’i japë fund një periudhe shumë të suksesshme te “Los Colchoneros”, ndërsa klubi ka nisur menjëherë kërkimet për zëvendësuesin e tij. Drejtori sportiv Mateu Alemany do të ketë detyrën për të gjetur pasuesin e Griezmannit, një mision aspak i lehtë. Megjithatë, sipas Sport, ai ka përpiluar tashmë një listë me tre kandidatë, e kryesuar nga Lee Kang-in i Paris Saint-Germainit. Atletico kishte tentuar ta transferonte Leen që në janar, kur po kërkonte një zëvendësues për Giacomo Raspadorin, i cili përfundoi tek Atalanta. Në fund, ata zgjodhën Ademola Lookmanin, por interesimi për Leen mbetet dhe ai mund të rikthehet në La Liga gjatë verës. Në listë është edhe Mason Greenwoodi, i cili ka bindur drejtuesit e Atleticos me paraqitjet e tij tek Olympique de Marseille. Ish-lojtari i Getafes vlerësohet për finalizimin, shpejtësinë dhe eksperiencën në La Liga. Kandidati i tretë është Ferran Torresi, për të cilin Alemany ka simpati të madhe që nga koha kur e transferoi te Barcelona në vitin 2022. Barcelona është gjithnjë e më e hapur për ta lënë të largohet, pasi synon të mbajë Robert Lewandowskin dhe të afrojë një sulmues të ri, që mund të jetë Julian Alvarezi i Atleticos. Pritet një verë tjetër shumë e ngarkuar për Atleticon, që synon të ngushtojë diferencën me Barcelonën dhe Real Madridin. Kushdo që do të vijë për të zëvendësuar Griezmannin do të ketë një detyrë të vështirë, ndaj presioni mbi Alemanyn është i madh për të bërë zgjedhjen e duhur./GazetaExpress/ The post Ylli i Barcelonës po monitorohet si pasardhës i Griezmannit nga Atletico appeared first on Gazeta Express.