Ungir karlmenn þurfa leyfi hersins til lengri dvalar í útlöndum

Fáir höfðu gefið ákvæðinu gaum fyrr en dagblaðið Frankfurter Rundschau fjallaði um það á föstudaginn. Lengri dvöl ber almennt að samþykkja og óljóst þykir hvernig yfirvöld bregðast við broti á tilkynningaskyldunni. Brýnt að vita hversu margir dvelja í útlöndum Í skriflegu svari ráðuneytisins segir að brýnt sé að vita hversu margir séu erlendis komi til neyðarástands. Einnig er viðurkennt að skilyrðin hafi víðtæk áhrif á líf ungs fólks og því sé verið að þróa reglur til að taka á undantekningartilvikum, ekki síst til að komast hjá of mikilli skriffinnsku. Lagalegur grunnur skilyrðanna liggur í lögum um herskyldu frá árinu 1956 sem hefur verið breytt nokkrum sinnum, seinast í desember. Þá var ákveðið að fjölga verulega í hernum á næsta áratug án þess að taka upp herskyldu. Þangað til gilti tilkynningaskyldan um lengri dvöl aðeins ef Þýskaland átti í stríði eða ef herkvaðning var hafin. Ráðuneytið segir reglurnar hafa verið svipaðar og nú á tímum kalda stríðsins án þess að það hefði sérstök áhrif.