Þrír menn grunaðir um að hafa táldregið fjórtán ára stúlkur

Þær voru undir áhrifum. Samkvæmt heimildum fréttastofu eru mennirnir af erlendum uppruna, en Ævar Pálmi vildi ekki tjá sig um þjóðerni mannanna.Lögreglan stöðvaði bílinn af tilviljun. Engin ábending hafði borist og stúlknanna var ekki leitað. Ævar Pálmi segir að samsetning hópsins, tímasetningin og ástand stúlknanna hafi verið með þeim hætti að lögreglu þótti vert að rannsaka frekar. Óvenjulegt sé að menn á þessum aldri séu á rúntinum með fjórtán ára stúlkum sem þeir þekki ekki og lögreglu beri skylda til að rannsaka hvort eitthvað saknæmt hafi átt sér stað. Mennirnir voru handteknir en sleppt úr haldi að loknum skýrslutökum og grunnrannsókn. Ekki þótti tilefni til að fara fram á gæsluvarðhald.Mennirnir eru grunaðir um brot á þriðju málsgrein 99. greinar barnaverndarlaga, sem snýr að því að sýna barni yfirgang, ruddalegt eða ósiðlegt athæfi, særa það eða móðga. Brotin varða allt að tveggja ára fangelsi. Ævar Pálmi segir rannsókn lögreglu meðal annars snúa að því hvort stúlkunum hafi verið byrlað.Samkvæmt heimildum fréttastofu eru engin tengsl á milli mannanna og stúlknanna. Samskipti þeirra á milli benda til þess að mennirnir hafi tælt stúlkurnar á samfélagsmiðlum. Til álita kemur að mennirnir hafi átt í samskiptum við aðrar stúlkur á þessum aldri.